عيون الشعر من اهل البادية

عيون الشعر

[ندعوك للتسجيل في المنتدى أو التعريف بنفسك لمعاينة هذه الصورة]
طار الكرى
طار الكرى عن موق عيني وفـّرا ........ وفـّزيت من نومي طرالي طواري
وابديت من جاش الحشا ما تدرّا .......... واسهرت من حولي بكثر الهذاري
خط ٍ لفاني زاد قلبي بحرّا ................ من شاكي ٍ ضيم النيا والعزاري
سـر يا قلـم واكتب على ما تورا .......... أزكـى سلام ٍ لابن عمي مشاري
شيـخ ٍ على درب الشجاعة مضرّا ........ من لابةٍ يوم الملاقا ضواري
يا ما سهرنا حكمنا ما يطرّا ............... واليوم دنيا ضاع فيها افتكاري
أشكـي لمن يبكـي له الجود طرّا ........... ضرّاب هامات العدا ما يداري
يا حيف يا خطو الشجاع المضرّا ......... في مصر مملوك ٍ لحمر العتاري
من الـزاد غاد ٍ له سنام ٍ وسرا ............ من الذل شبعان ٍ من العز عاري
وش عاد لو تلبس حرير ٍ يجرّا ........... ومتـّوج ٍ تاج الذهب بالزراري
دنياك يابن العم هاذي مغرّا ............... ولا خير في دنيا حلاها مراري
تسقيك حلو ٍ ثم تسقيك مُرا ................ ولذّاتها بين البرايا عواري
إكفخ بجنحان السعد لا تدرّا ............... العمر ما ياقاه كثر المداري
ما في يد المخلوق نفع ٍ وضرا ........... ما قدّر الباري على العبد جاري
واسلم وسلم لي على من تورّا ............ واذكر لهم حالي وما كان جاري
إن سايلوا عنيّ فحالي تسرّا .............. قبقب شـراع العز لو كنت داري
يوم ان كل ٍ من عشيره تبرّا ............. حطيت الاجرب لي عشيرٍ مباري
رميت عني برقع الذل برّا ............... ولا خير فيمن لا يدوس المحاري
نعم الصديق ليا سطا ثم جرّا ............ يودع مناعير النشاما حباري
ونزلتها غصب ٍبخيرٍ وشرّا ............. وجمعت شمل ٍ بالقرايا وقاري
وحصّنت نجد ٍ عقب ماهي تطرّا ....... مصيونة ٍ عن حر لفح الذواري
والشرع فيها قد مشى واستقرا .......... ويقرا بنا درس الضحى كل قاري
زال الهوى والغي عنها وفرّا ........... ويقضي بنا القاضي بليا مصاري
وان سلت عمن قال لي لا تزرّا ........ نجد ٍ غدت باب ٍ بليا سواري
ومن أمن الجاني على ما تحرا ......... وتازا حريمه بالقرايا وجاري
واجهدت في طلب العلا لين قرّا ....... وطاب الكرى مع لابسات الخزاري
ومن غاص غبّات البحر جاب درّا .... ويحمد مصابيح السرى كل ساري
وانا احمد اللي جاب لي ما تحرا ....... واذهب غبار الذل عني وطاري
والعمر ما يزداد مثقال ذرا ............. عمر الفتى والرزق في كف باري
وصلاة ربي عد ما خط بالرا .......... على النبي ما طاف بالبيت عاري
الإمام تركي بن عبد الله بن سعود

نصيحة بركات الشريف
يالله ياللي كل الأمّات ترجيك ............. ياواحدٍ ما خاب حي ٍ ترجاك
يارب عبدٍ ما مشى في معاصيك ......... مايمشي ألا في محبتك ورضاك
يامرقب ٍ بالصبح نطيت راقيك ........... ما واحد ٍ قبلي خبرته تعلاك
وليّت يا ذالدهـر مكثر بلاويك ............. الله يزودنا السلامة من اتلاك
ياللي على العربان عمت شكاويك ......... وليت يا دهر الشقا ول مقواك
واليوم هالكانون غاد ٍ شبابيك .............. تلعب به الارياح مع كل شباك
يا مالك اسمع جابتي يوم أوصيّك .......... وافطن ترى يابوك بآمرك وانهاك
وصيّةٍ من والدٍ طامعٍ فيك .................. تسبق على الساقة لسانه لعلياك
أوصيك بالتقوى عسى الله يهديك ........... لها وتدركهـا بتوفيق مولاك
الله برب اجدادك الغـر يعطيـك ............. رضاه مع ما تـمنّى من مناك
إحفظ دبشك اللي عن الناس مغنيك ......... اللي ليا بان الخلل فيك يرفاك
واعرف ترى مكة حكمها بناخيك ........... لو تشحذه خمسة ملاليم ما اعطاك
إجعـل دروب المرجلة من معانيك .......... واحذر تميّل عن درجها بمرقاك
لا تنسدح عنها وتبغاني اعطيك ............. جميع ما يكفيك ما حاصلٍ ذاك
أدّب ولدك إن كان تبغيه يشفيك ............. واستسعفه من بعد مرباه بالاك
أما سـمج واستسمجك عند شانيك ............ ويفرّ من فعله صديقك وشرواك
وألاّ بعد جهله ترى هو بياذيك ................ لو زعلت امه لا تخليه يالاك
واحذر تضيّع كل من هو ذخر فيك ........... معروفه لا تـنساه واوفه بعرفاك
ترى الصنايع بين الاجواد تشريك ............. ليا طمعـت بغرسها لا تعدّاك
واحذر سرور بغبّة البحر يرميك .............. ولا عنده افلس من تشكّيك وبكاك
واوف الرجال حقوقها قبل تعنيك ............. لا تعتمد بالقول فالحق يقفاك
وهرج النميمة والقفا لا يجي فيك .............. واياك عرض الغافل اياك إياك
تبدي حديثٍ للملأ فيه تشكيك .................. وتهيم عند الناس بالكذب واشراك
وليا نويت احذر تعلم بطاريك .................. كم واحدٍ تبغي به العرف واغواك
واحذر شـماتة صاحبٍ لك مصافيك ........... وليا جرالك جاري ٍ قال لولاك
ولا تحسب إن الله قطوع ٍ يخليك ............... ولا تفرح إن الله على الناس بدّاك
الضيـف قدّم له هلا حين يلفيك ................. ومما تطوله يا فتى الجود يمناك
إحذر تلقّي الضيف مقرن علابيك .............. خله محبٍ لك صديقٍ إذا جاك
واوصيك زلات الصديق إن عثا فيك .......... مازال يغطاها الشعر فاحتمل ذاك
راعه ولو ما شفت إنه يراعيك ................ عساك تكسـر نيته عن معاداك
واحذر عدوك لو ظهر بيصافيك ............... خلك نبيه وراقبه وين ما جاك
لا تأمنه واطلب من الله ينجيّك ................. ويكفيك ربك شر ذولا وذولاك
شفني أنا يابوك بآمرك وانهيك ................ عن التعـرض بـين الاثنين حذراك
إذا حضرت طلابةٍ مع شرابيك ................ إسع لهم بالصلح واللاش يفداك
إبذل لهم بالطيب ربك ينجّيك .................. ولا تجضع الميزان مع ذا ولا ذاك
أما الشهادة فأدّها إن دعوا فيك ................ بيّن عمود الدين لا عميت ارياك
بالك تماشي واحدٍ لك يردّيك ................... طالع بني جنسك وفكّر بممشاك
رابع أصيلٍ في زمانك يشاكيك ................ لا شاف خملاتك عن الناس غطاك
واحذرك عن طرد المقفي حذاريك ............ عليك بالمقبل وخل من تعداك
واوصيك لا تشكي علينا بلاويك .............. أنت السبب طرفك عينك بيمناك
واعرف ترى اللي وطا الفعر واطيك ......... ولا انته أعز من الجماعة هذولاك
ألمسك يا راسي عن الذل واخطيك ........... واحذر تكلم يا لساني حذراك
وألطف بجارك ثم قم دون عانيك ............ وافطن لما يعنيك عن ربعة اخواك
يا ذيب وان جتك الغنم في مفاليك ............ فإكمن إلين ان الرعايا تعدّاك
فيما مضى يا ذيب تفرس بأياديك ............ واليوم جاء ذيبٍ عن الفرس عدّاك
يا ذيب عاهدني واعاهدك ما ارميك ......... ما ارميك أنا ياذيب لو زان مرماك
والنفس خالف رايها قبل ترميك ............. ترى لهـا الشيطان يرمي بالاهلاك
ومن بعد ذا لا تصحب النذل يعديك ......... وعن صحبة الأنذال حاشاك حاشاك
ترى العشيـر النذل يخلف طواريك .......... وانا ارجي انك ما تجي دون آباك
والهقوة انك ما تجي دون اهاليك ............ ولا اظن عود الورد يثمر يتنباك
والحر مثلك يستحي يصحب الديك .......... وان صاحبه عاعا معاعات الادياك
لا تستمع قول الطرف يوم يلفيك ............ بالكذب يقضي حاجته كل ما جاك
ومن نم لك نم بك ولا فيه تشكيك ........... وإليـاه قد أزرى رفيقك وأزراك
عندك حكى فينا وعندي حكى فيك .......... وأصبحت مبغضنا وحنا كرهناك
ما اخطاك ما صابك ولو كان راميك ........ واللي يصيبك لو تتقيت ما اخطاك
عندي مظنّةٍ ما تمثلتها فيك ................... واطلب لك التوفيق من عند مولاك
بركات الشريف
نومك طرب
نومك طرب وأنا بنومي هواجيس ===== ما ساهرك بالليل كثر الهمومي
أسهر ليا نامت عيون الهداريس ====== وبالليل أراعي ساهرات النجومي
قالوا جهلت وقلت جهلٍ بلا قيس ====== الجاهل اللي ما يعرف اليمومي
أشوف عدلات الليالي مقابيس ======== ولحدٍ من الدنيا عظامه سلومي
تضحك وتخفي لك خفى الهناديس ====== تفطر لها يومٍ ويومٍ تصومي
إعمل وتلقى وإفهم العلم بالقيس ======== دنياك لو زانت تراها نقومي
والعز فوق معسكرات السواديس ======= ليا قصدت اللي بالأشياء رحومي
قبٍ تنازى بالنشاما كراديس ========== والطير في روجاتهنه يحومي
ليا توافق مشور السوء وإبليس ======== تبر منه وعز ربي يدومي
بالليل أصالي حاميات المحاميس ======= والصبح ألاوي كل قباً قحومي
أربع سنين ودمع عيني أماريس ======== والعين تسهر كن فيها هزومي
وليا ركبت معالجات المضاريس ======= يبرد على قلبي لهيب السمومي
إن جن بنا مثل النعام الأماريس ======= لا خف عجلٍ مع رقاق الحزومي
أستلحق اللي يطلبون النواميس ======== اللي من الأقصين وأدنى اللحومي
وإن جن بالميدان مثل الدواويس ======= وطار الغطا عن قانيات الرقومي
عرجٍ بأهلهن كنهن القرانيس ========= على الطريح مصوبراتٍ كظومي
وليا سمك عج الرمك بالملابيس ======= المسعد اللي حظ ربعه يقومي
صوابنا بالميل عمقٍ ليا قيس ========= وطريحنا في مثبره ما يقومي
ولا خير في كثر الحكي والتماليس ====== هرجٍ بلا فعل يجي به وهومي
لومي على اللي ينقلون العبابيس ======= وأهل الفرنج وكل رامي لحومي
من لا يديس الرأ من قبل ما ديس ====== عليه داسوه العيال القرومي
ومن لا يقلط شذرة السيف والكيس ====== يبدي عليه من الليالي ثلومي
والقصر ما يصلح على غير تأسيس ===== ومن لا تعلم ما تفيد العلومي
ومن لا خذا الدنيا بميزٍ وتقييس ======== مثل الذي يصبح بليلٍ يعومي
كلّ القلم من كتبنا للقراطيس ========= وإركابنا من كثر الأقران تومي
للشيخ من يعطي الفقارى المفاليس ====== يبدّل الساعه بعزٍ يقومي
والحر لا دبت عليه النواميس ========= يشهر وعن دار المذلة يشومي
وليا إكترب من بعض الأشياء نسانيس ==== إعزم ولابد الفرج بالعزومي
باب الفرج يلبّسك نظيف الملابيس ====== ينجيك بأيام الكرب والزحومي
أوجس بقلبي مثل دق النحاحيس ======= الله يلوم اللي لحالي يلومي
يجلى صدى قلبي ضبيح المهاريس ====== لا قام شراب القهاوي يعومي
ودلالٍ فوق النار دايم مجاليس ========= إكرامهن حقٍ علينا لزومي
من صنعة الصبة وخمس التخاميس ====== بريةٍ يعمل بها كل يومي
وبهارهن هيلٍ بليا حواسيس ========== كيفٍ يعدى للنشاما القرومي
عدّه لحماي العياد المراويس ========== وألا الحصان اللي بقينه يهومي
حتى يزين لنا المثل والتوانيس ========= والكيف طاب لمن يفك القحومي
وصلاة ربي عد رمل الطعاميس ======== على شفيع الخلق يوم اللمومي
تركي بن حميد

سلايل كحيلان
القلب من كثر الهواجيس قزّان ......... ما يستريح من الدهر ربع ساعه
يا غافر الزلات يا والي الشان ......... تجعل من التقوى لنفسي بضاعه
أنا على لان وربعي على لان .......... متخالفٍ رأيي ورأي الجماعه
ماني ولد شاوي يسرّح الضان ......... يفرح بتصنيف البهم والرضاعه
أنا ولد علي سلايل كحيلان ............ وربي خلقني للسبايا وداعه
عيبٍ على اللي يتقي عقب ما بان ...... وعيبٍ طمان النفس عقب ارتفاعه
الناس ما تسقيك ليا صرت ظميان ...... ولا يشـرب المظمي كود من ذراعه
اضرب على الكايد ليا صرت بحلان .... وعند الولي وصل الرشا وانقطاعه
إما تجيب عقود حصٍ ومرجان .......... والا فلبليـس ٍ يطير بشعاعه
عبيد العلي الرشيد

ربعي لقوبي عيب
طلبت ربٍ يعلم السر والغيب ................. يقبل صلاتي له ويقبل صيامي
ويجعل لنا عرضٍ نزيهٍ عن العيب ........... ويـفكنا من شر سو الآثامي
ابن ادم ملفا الردى والعذاريب ................ لو ما فعل رميت عليه التهامي
جليت عن نفسي شبا الشك والريب .......... ولا احسب يلقون العرب بي كلامي
وربعي لقوبي عقب شيبي عذاريب .......... بتسطير كذب مفسرين الحلامي
قلت اخبروني ويش معنى هاك العيب ....... قالوا علـى ساقة رفيقك تحامي
قلت ان هذا من قديم ٍ لنا عيب .............. مستارثـينه مـن خوال وعمامي
العيب ترك المعرضة بالمواجيـب .......... ولا الرفيق بفزعته ما نلامي
رفيقنا كنه بروس الشخانيب ................ في رأس حيدٍ نايفٍ ما يضامي
ورفيقنا ما نجدعه للقصاصيب ............. يجبر بنا لو هو كسير العظامي
ورفيقنا لوهو من الجد بصليب ............. متعلقٍ معنا برأس السنامي
هاذي قدايمنا ليا عدوّا الطيب ............... ونذرا ليا هبـّت لنا بالولامي
ويوم الوغى ما نستشير الزاريب ........... ليا طار عن سود العيون اللثامي
ومركاضنا يشبع به الطير والذيب .......... ونروي معاطيش السيوف الظوامي
نلحق على سردٍ يجنك جناديب ............. بمطارقٍ مع مثل صـف النعامي
عبيد العلي الرشيد

يا فاطري
يا فاطري ذبي خرايم طميـّة ............ ليا اشمخرت مثل خشم الحصاني
ذبي طمية والفياض العذية .............. تنحّري برزان زين المباني
سلام اخو نورة لزومٍ عليّه .............. قبل القريب وقبل قاصي وداني
وليا قضيت اللازم اللي عليّه ........... اللازم اللي ما قضاه الهداني
الجدي حطيته بورك المطيّة ............ وافرق نحرها عن سهيل اليماني
نبغي ندوّر فوقها طفلةٍ عسوجية ....... ريحة نسمها كالزباد العماني
تباشروبي عقب سابع ضحية .......... وانا عليّ ابرك ليالي زماني
خبّي خبيب الذيب بالجرهدية .......... ليا طالع الشيهان واللي داني
لومي على الطيّب ولومه عليّه ........ هو ليه ياخذ عشقتي ما تناني
ليته صبر عامين والا ضحيه ......... لين يـميّز في غربتي ويش جاني
أما غدا راكان بالمهمهية .............. والا يجي يصهل صهيل الحصاني
روحي وانا راكان زبن الونيّه ........ ما يشرب الفضلات كود الهداني
حريبنا اليا اهدى علينا هدية .......... عندي مجازاته مثل ما جزاني
نسهج محله لين يخلف نويّه .......... يصبر كما يصبر جديع الاذاني
من القطيف الى النفود محميّه ........ الا ان يـمشيها خوي ٍ وعاني
افعالنا هاذي علينا وصية ............ فرضٍ علينا مثل فرض رمضاني
الصدق يظهر من حباله رديّه ........ والكذب يقطع من حباله متاني
راكان بن حثلين
عريب الجد والخالي
أيامنا والليالي كم نعاتبها =========== شبنا وشابت وعفنا بعض الاحوالي
تاعد مواعيد والجاهل مكذبها ======== واللي عرف حدّها من همها سالي
إن اقبلت يوم ما تصفي مشاربها ====== تقفي وتقبل وما دامت على حالي
في كل يوم ٍ تورينا عجايبها ======== واليوم الاول تراه أحسن من التالي
أيام في غلبها وايام نغلبها ========= وايام فيها سـوا والدهر ميّالي
جربت الايام ومثلي من يجربها ====== تجريب عاقل وذاق المر والحالي
نضحك مع الناس والدنيا نلاعبها ===== نمشي مع الفي طوع ٍ حيث ما مالي
كم من علوم ٍ وكم آداب نكسبها ====== والشعـر مازون مثقال ٍ بمثقالي
أعرف حروف الهجا بالرمز واكتبها === عاقل ومجنون حاوي كل الاشكالي
لكنّ حظي ردي والروح متعبها ====== ما فادني حسن تأديـبي مع امثالي
إن جيت أبي حاجة ٍ عزّت مطالبها ==== العفو ما واحد ٍ في الناس يا والي
قوم ٍ ليا جيتهم رفـّت شواربها ======= بالضحك وقلوبها فيها الردا كالي
وقوم ٍ ليا جيتها صكّت حواجبها ====== وابدت لي البغض في مقفاي واقبالي
ما كنّي إلا مسوي حال مغضبها ====== والكل فـي عشرته ماكر ودجّالي
يا حيف تخفي أمورٍ كنت حاسبها ===== واللي على بالهم كله على بالي
الجار جافي وكم قومٍ محاربها ======= والأهل واصحابنا والدون والعالي
والروح وش عذرها في ترك واجبها === راح الحسب والنسب في جمع الاموالي
نفسي تبي العز والحاجات تغصبها ==== ترمي بها بين أجاويد وانذالِي
المال يحيي عظام ٍ لا حياة ابها ====== كالسيل يحيي الهشيم الدمدم البالي
عفت المنازل وروحي يوم اجنـّبها ==== منها غنيمة وعنها البعد أولالي
لا خير في ديرة ٍ يشقى العزيز ابها ==== يمشي مع الناس في همٍ وإذلالِ
دارٍ بها الخوف دومٍ ما يغايبها ====== والجوع فيها ومعها بعض الاحوالي
جوعى سراحينها شبعى ثعاليها ====== الكلب والهر يقدم كل ريبالي
عز الفتى راس ماله من مكاسبها ===== يا مرتضي الهون لا عـزٍ ولا مالي
ذللت بالروح لين ارخصت جانبها ==== وانا عتيـبي عريب الجد والخالي
قومٍ تدوس الأفاعي مع عقاربها ===== وإلها عزايم تهدّ الشامخ العالي
خل المنازل وقل للبين يندبها ====== يبكي عليها بدمع العين هطالي
لا تعمر الدار والقالات تخربها ===== بيع الردا بالخسارة واشتر الغالي
ما ضاقت الأرض وانسدت مذاهبها ==== فيها السعة والمراجل والتفّـتالي
دارٍ بدار وجيرانٍ نقاربها ======== وأرضٍ بأرض وأطلال ٍ بأطلالي
والناس اجانيب لين انك تصاحبها ==== وتكون منهـم كما قالوا بالامثالي
الأرض لله نمشي في مناكبها ====== والله قدّر لـنا أرزاق وآجالي
حث المطايا وشرّقها وغرّبها ====== واقطع بها كل فج ٍ دارس ٍ خالي
واطعن نحور الفيافي في ترايبها ==== وابعد عن الهم تمسي خالي البالي
في كل عمليـّةٍ تقطع براكبها ====== فدافد البيد درهام ٍ وزرفالي
تبعدك عن دار قومٍ ودارٍ تقرّبها ==== واختر لنفسك للمنزال منزالي
لومت في ديرةٍ يجفاك صاحبها ==== كم ذا الـجفا والتجافي والتـّعلالي
دوس المخاطر ولا تخشى عواقبها === الموت واحد وبعد العز يجلالي
إن المنايا إذا مدّت مخالبها ======= تدركّ لو كنت في جو السماء العالي
ما قرّت الأسود في عالي مراقبها === تسعى على الرزق ما حنـّت للاشبالي
والشمس في برجها والغيم يحجبها === تقفي وتقبل لها في الفلك مجدالي
بديوي الوقداني

[ندعوك للتسجيل في المنتدى أو التعريف بنفسك لمعاينة هذه الصورة]

أشهر قصائد الرثاء

شالح بن هدلان يرثي ابنه ذيب وهو حي
ما ذكر حي ٍ بكى حي يا ذيب === واليوم انا ببكيك لو كنت حيا
ويا ذيب يبكونك هل الفطرّ الشيب === إن لايعتهم مثل خيل المحيا
وتبكيك قطعان ٍعليها الكواليب === وشيّال حمل اللي يبون الكفيّا
وتبكيك وضح ٍعلقوها دباديب === إن رددت مـن يمّة الخوف عيّا
ويبكيك من صكّت عليه المغاليـب === إن صاح بأعلى الصوت ياهل الحميّا
ننزل بك الحزم المطرّف لياهيب === إن رددوهن ناقلين العصيا
أنا اشهد انك بيننا منقع الطيب === والطيب عـسـرٍ مطلبه ما تهـّيا

سعدون العواجي يرثي أبنائه عقاب وحجاب
يا ونةٍ ونيتهـا تسع ونات === مع تسع مع تسعين مع عشر ألوفي
مع كثرهن بأقصى الحشا مستكنات === عداد خلق الله كثير الوصوفي
ونة طريحٍ طاح والخيل عجلات === كسره حدا الساقين غادٍ سعوفي
على سيوفٍ بالملاقى مهمات === سيفين أغلى ما غدا من سيوفي
وعلى محوصٍ بالموارد قويات === أسقي بهن لو القبايل صفوفي
أحشم بحشمتهن لوهن بعيدات === وأنام لو ان الضواري تحوفي
خليتني يا عقاب مابه مروات === عيالك صغارٍ والدهر به جنوفي
من عقبكم ما نبكي الحي لو مات === ولاني على الدنيا كثير الحسوفي
يا طول ما جريت بالصدر ونات === على فراق معطرين السيوفي
يا عقاب عقبك شفت بالوقت ميلات === وأوجست انا من ضيم بقعا حفوفي
مرحوم يا نطّاح وجيه المغيرات === لاجن كراديس السبايا صفوفي
مرحوم يا مشبع سباعٍ مجيعات === وعز الله أنه عقبكم زاد خوفي
الخيل تدري بك نهار المثارات === ياللي على كل الملأ فيك نوفي
والخيل تقفي من فعولك معيفات === تاطا شخانيب الرضم ما تشوفي

ضيف الله بن حميد يرثي أخاه عبيد
يا ونتي ونة كسير الجباره === ليا وقف ماحتال وليا قعد ون
عليك يا شباب ضو المناره === عليك ترفات الصبايا ينوحن
من مات عقب عبيد قلنا وداره === لا باكيٍ عقبه ولا قايلٍ من
تبكيك صفر ٍ لبسوها غياره === تبكيك يوم ان السبايا يعنن
وتبكيك وضحٍ ربعن بالزباره === ليا قزن مع خايع ٍ ما يردن
الخيل عقب عبيد مابه نماره === وش عاد لو راحن وش عاد لو جن
يا شيخ ما تامر عليهم بغاره === كود الجروح اللي على القلب يبرن
يقطع صبيٍ ما ينادي بثاره === ليا اقبلن ذولي وذوليك قفن
ياهل الرمك كل يعسّف مهاره === والمنع ما نطريه لاهم ولا حن

خزنة الملحم ترثي زوجها سطام الطيار وابنها محمد
البارحة جريت بالصدر ونات === والنوم عيّا لا يهملج قليله
يا عين لا تبكين كثرة وقلات === إبكي على اللي كاسبين النفيله
إبكي على سطام زبن الونيّات === يا لولب الحكّام كلٍ يجيله
إبكي العديم اللي مع الناس ما مات === مرباع وايل بالسنين المحيله
إبكي ذعار الخيل وان صار شدات === زيزوم جيشه بالسنين الجليله
وابكي على محمد حصان المهمات === هو بيرق الفرسان وشهاب ليله
يا الله يا ناهض سبع السماوات === يا رافع ٍ شدّات من يلتجيله
تخلي لنا واحد ٍ فيه هقوات === سلطان نور العين تالي السليله
يبني بيوت العز من عقب ما فات === الله كريم وكلنا نشتكيله
عقب الرجال اهل الفعول القديمات === شيخان وايل من سنينٍ طويله
يجبر عزانا في عظيم المصيبات === يوم المقدّر ما لنا فيه حيله

كنة الشمرية ترثي زوجها
بعض العرب موتهم تخفيف === مير البلا موت عبدالله
مرحوم يا مهليٍ بالضيف === يا مكثّر الهيل بالدله
إذا مسكت زينة التوصيف === الدم من مضربه شله
ياما صفقهن ووردن عيف === وياما حمى كل منتله

[ندعوك للتسجيل في المنتدى أو التعريف بنفسك لمعاينة هذه الصورة]

أبيات خالدة

هناك أبيات تميزت بملامستها لأعماق الناس وقربها من همومهم وقضاياهم حيث جاءت بأسلوب مطابق لما يريدون التعبير عنه فظلت عالقة في الأذهان والعقول وحفظها الناس وتناقلوها حتى يومنا هذا لتضرب بها الأمثال في الأحداث والمناسبات المشابهة، ومما قيل في الحكمة والنصح والارشاد هذه الدرر الثمينة من المقتطفات الشعرية

أحفظ دبشك اللي عن الناس مغنيك ==== اللي ليا بان الخلل فيك يرفاك
وأعرف ترى مكة ولاها بناخيك ===== لو تطلبه خمسة ملاليم ما أعطاك
والحر مثلك ما يصحب الديك ======= وإن صاحبه عاعا معاعات الأدياك
بركات الشريف

ليا عاد ما للرجّال رأيٍ يدله ====== يأخذ من أشوار الرجال دليل
الشريف جري الجنوبي

من عوّد العين المنام تعوّدت ======= ومن عوّد العين المساري تعاود
ومن عوّد الصبيان أكل بيته ======= عاودوه في عسر الليالي الشدايد
راشد الخلاوي

النوم رأس اللوم بان الردى به ====== واللي يبي الطولات نومه شلافيح
الذيب ما يرقد ورزقه نهابه ====== يدوّر الغرات عند المصاليح
واللي يبا الطولات يتعب ركابه ====== والعز بأكوار النضا ياهل الفيح
مريبد العدواني

فتى بلا عزم حياته مذلة ======== والعزم لقلوب الرجال طبيب
من لا صبر بالعسر ما ذاق يسرها ===== وباب الفرج للصابرين قريب
محمد الأحمد السديري

مقام الفتى في منصب العز ساعة ===== ولا ألف عام يصحب الذل صاحبه
راشد الخلاوي

المراجل ما تهيّا هالسّويا ===== كود من عض النواجذ في سنونه
عبدالله القريفة

الظفر ساعه وإن حلّ ماجوبه ===== والمراجل لها حزّات ورجالي
ضيدان العارضي

الحمّرة تدرك معوشة عيالها ===== وألا الرجل يبغى منه بعض الأحوال
خلف أبو زويد الشمري

ليا صار ما توفي عميلك من الصاع ====== ما ينقعد لك عند حصن النواهيم
شبرٍ من البيداء يعوّضك بالافزاع======= وسود الليالي يبعدنّك عن الضيم
سعدون العواجي

من لا يديس الرأي من قبل ما ديس ===== عليه داسوه العيال القرومي
ومن لا يقلّط شذرة السيف والكيس ====== يبدي عليه من الليالي ثلومي
والقصر ما يصلح على غير تسييس ===== ومن لا تعلم ما تفيد العلومي
تركي بن حميد

الناس ما تسقيك لا صرت عطشان ====== ولا يشرب المضمي كود من ذراعه
أضرب على الكايد ليا صرت بحلان ===== وعند الولي وصل الحبل وإنقطاعه
عيبٍ على اللي يتقي عقب ما بان ====== وعيبٍ طمان النفس عقب إرتفاعه
عبيد العلي الرشيد

من حل دار الناس حلّوا دياره ====== لابد ما تسكن دياره ويغبن
ومن شق ستار الناس شقوّا ستاره ======= ومن ضحك بالثرمان ضحك بلا سن
شالح بن هدلان

حيٍ يورّيك المذلة وتغليه ====== أنا أشهد إنك ميت القلب عامي
من لا يوّدك لا توّده وترجيه ==== أرفع مقامك يا عزيز المقامي
محمد الأحمد السديري

الضرس يعبى له عن السهر مقلاع ==== حتى تنام العين ما هي طلابه
خلف الأذن

أنا أشهد إن بقصرة الرجل نوماس ==== لا صار ما للرجل داعيٍ دعاها
مبارك بن عبيكة

لا تأخذ الدنيا خراصٍ وهقوات ====== يقطعك من نقل الصميل البرادي
لك شوفةٍ وحده وللناس شوفات ===== ولا واديٍ سيله يفيض بوادي
عبدالله بن سبيّل

لا يأمن المظهود جمع المعزة ====== ولا يأمن الجمع العزيز الظهايد
أيضا وبيت الفقر لا يأمن الغنى ===== وبيت الغنى لا يأمن الفقر عايد
راشد الخلاوي

ليا خاب ظنك بالرفيق الوالي ===== ما لك مشاريهٍ على نايد الناس
محمد الأحمد السديري

يا بايعٍ جوخٍ على غير أهاليه ===== مثل الذي ينزل بقصرٍ خرابه
ولد الردي لو طاب لك لا تماشيه ===== يومين والثالث يبين الردى به
مشعان بن هذال

لعل قصرٍ ما يجي له ظلالي ===== ينهد من عالي مبانيه للساس
لا صار ما هو مدهلٍ للرجالي ====== وملجأ لمن هو يشكي الضيم والباس
محمد الأحمد السديري

الأجواد إن قاربتهم ما تملّهم ======= والأنذال إن قاربتها عفت ما بها
الأجواد وإن قالوا حديثٍ وفوبه ===== والأنذال منطوق الحكايا كذابها
الأجواد صندوقين مسك وعنبر ===== ليا فتحت أبوابها جاك ما بها
والأنذال لو غسّلوا ايديهم تنجّست ===== نجاسة قلوبٍ ما يفيد الدواء بها
محمد المهادي

أحدٍ على جاره بختري ونوّار ====== وأحدٍ على جاره صفاةٍ محيفه
خطو الولد مثل البليهي ليا ثار ====== زودٍ على حمله نقل حمل أليفه
وخطو الولد يا مال قصّاف الأعمار === لا نافعٍ نفسه ولا منه خيفه
مقحم النجدي الصقري

شبعنا وشبع الذّر من زاد سورنا ==== وللذّر في زاد الكرام معاش
يعطي العطى من كان ضاريٍ للعطى ==== ويمنّ العطى من كان خاله لاش
ومن لا يعرّب منسبه قبل منشبه === تروح عليه عيلانه بلاش
..........

عرّب وليدك عرّبه ==== والنار من مقباسها
والعز بوروك النساء ==== اللي عريبٍ ساسها
بنت الردي لا تأخذه ===== لو هو طويلٍ رأسها
...........

لا تأخذ الهزلا على شأن مالها ===== ولا تقتبس من نارهم بالوقايد
لا تأخذ ألا بنت قومٍ حميده ===== لعل ولدٍ منها يجي بالفوايد
راشد الخلاوي

أبا أنذر اللي من ربوعي يبا الطيب ====== لا يأخذ ألا من بيوت الشجاعه
يجي ولدها مذربٍ كنّه الذيب ======== عزٍ لأبوه وكل ما قال طاعه
وبنت الردي يأتي ولدها كما الهيب ====== غبنٍ لأبوه وفاشله بالجماعه
يا كبر زوله عند بيت المعازيب ====== متحريٍ متى يقدم متاعه
شالح بن هدلان

الطيب ما هو بس للضاعنينا ===== قسّم على كل الوجيه المفاليح
بداح العنقري

ما مال ألا فارغٍ من زبرها ===== ولا حي ألا مقتفيه المماتي
سعدون العواجي

لولا الهرم والفقر والثالث الموت ===== يا الآدمي بالكون يا عظم شأنك
لولا الثلاث وشأن من قدّر الفوت ==== نفذّت كل اللي يقوله لسانك
محمد الأحمد السديري

أيامنا والليالي كم نعاتبها ===== شبنا وشابت وعفنا بعض الأحوالي
بديوي الوقداني

نعد الليالي والليالي تعدنا ===== العمر يفنى والليالي بزايد
راشد الخلاوي

شابت لحانا ما لحقنا هوانا ===== وعزي لمن شابت لحاهم على ماش
مناحي بن معدل السهلي

وأخير منها ركعتين بالأسحار ==== لا طاب نوم اللي حياته خساره
تركي بن حميد

يا دحيم ريضان الجماعة مريفه ===== واللي مع الأجناب كنّه على نار
الطير بالجنحان ما أحلا رفيفه ====== وليا إنكسر حدا الجناحين ما طار
ويمنى بلا يسرى تراها ضعيفه ====== ورجلٍ بلا ربعٍ على الغبن صبّار
عبدالله بن سجوان الرويس

والله يا لولا العظم يومني أملاه ===== أكويه بالجمرة ويكوي جروحي
مع دلةٍ صفرا على النار مركاه ===== أقصر بصبتها على كيف روحي
فنجالها يشدي خضاب الخونداه ===== الجادل اللي عند أهلها طموحي
عدّه لمن يثني خلاف المخلاه ====== فكاك بالضيقات راع اللحوحي
وعدّه لقرمٍ ما توني مطاياه ======== يضوي ولو صكت عليه النبوحي
وعدّه لمن تدفق السمن يمناه ====== عيدٍ لربعه بالزمان الشحوحي
وباقي الرجال فحول نسوان ورعاه ===== ضباط مال وحافظين السروحي
ذعار بن مشاري بن ربيعان

لا شفت خطو الظول بالك تعسّه ===== وإن فارقك شر المخاليق خلّه
لو عندنا من غيب الأيام رسّه ===== الآدمي مصلوح نفسه يدلّه
محمد بن مهلهل بن شعلان

من صد عني له الطاروق خليته ==== عيبٍ على البنات الناس يبلاها
محمد بن حجي المطيري

من عافنا عفناه ولو كان غالي ===== ومن باعنا بالرخص بعناه بزهود
مزنة بنت مكازي

برقٍ مصدٍ لو مزونه لها نور ===== لا تستخيله لو ربيعك شفاقه
من لا استشارك لا تعدّي له الشور ==== ومن لا يوّدك نور عينك فراقه
الدقيس الجمّيليّه

الزول زوله والحلايا حلاياه ==== والفعل ماهوب فعل واف الخصايل
زوجة وديد بن عروج

يا عين هلي صافي الدمع هليه ===== وليا انتهى صافيه هاتي سريبه
اللي يبينا عيّت النفس تبغيه ===== واللي نبي عيّا البخت لا يجيبه
نورة الحوشان
[ندعوك للتسجيل في المنتدى أو التعريف بنفسك لمعاينة هذه الصورة]

</TD></TR></TABLE>

[ندعوك للتسجيل في المنتدى أو التعريف بنفسك لمعاينة هذه الصورة]

» قصة البادية
» صور تراثية من اهل البادية
» نباتات فى ارض اهل البادية
» جديد البادية
» مثبت عادات أهل البادية